وزیر اعظم شہباز شریف کا روس کا دورہ، توانائی اور معاشی تعاون مرکزی نکتہ ہوگا

وزیر اعظم شہباز شریف نومبر میں روس کا دورہ کریں گے جہاں وہ شنگھائی تعاون تنظیم کے سربراہانِ حکومت کے اجلاس میں پاکستان کی نمائندگی کریں گے۔

ذرائع کے مطابق یہ اجلاس روس میں منعقد ہوگا اور تنظیم کے تمام رکن ممالک کے سربراہانِ حکومت اس میں شریک ہوں گے۔

وزیر اعظم شہباز شریف اجلاس سے خطاب میں خطے میں معاشی، تجارتی اور سرمایہ کاری کے تعلقات کو مضبوط بنانے پر زور دیں گے۔

دورے کے دوران ان کی روسی قیادت کے ساتھ دو طرفہ ملاقاتیں بھی متوقع ہیں جن میں توانائی کے شعبے میں تعاون، تجارتی تعلقات کے فروغ اور سرمایہ کاری کے نئے مواقع پر بات چیت ہوگی۔

دونوں ممالک زرعی، سائنسی اور تکنیکی شعبوں میں بھی مشترکہ تعاون کے امکانات پر غور کریں گے تاکہ دیرپا اور فائدہ مند شراکت داری قائم کی جا سکے۔

پاکستان کی شنگھائی تعاون تنظیم میں فعال شرکت اس کے علاقائی اور بین الاقوامی تعلقات کو مزید مضبوط بنانے کے عزم کی عکاسی کرتی ہے۔