سعودی عرب نے فلسطینی خزانے کے لیے 9 کروڑ ڈالر کی نئی گرانٹ فراہم کردی

سعودی عرب نے فلسطینی خزانے کی مالی مدد کے لیے 90 ملین ڈالر (9 کروڑ ڈالر) کی نئی گرانٹ فراہم کی ہے، جو 2025 میں فلسطینی اتھارٹی کی مسلسل حمایت کا حصہ ہے۔

یہ رقم عمان میں سعودی سفارت خانے میں اس وقت وصول کی گئی جب فلسطینی وزیر منصوبہ بندی و بین الاقوامی تعاون اسطفان سلامہ نے اردن میں سعودی سفیر اور ریاستِ فلسطین کے غیر مقیم کمشنر شہزادہ منصور بن خالد بن فرحان آل سعود سے ملاقات کی۔

فلسطینی حکام کے مطابق یہ مالی معاونت ایسے وقت میں فراہم کی گئی ہے جب فلسطینی اتھارٹی شدید معاشی دباؤ اور بجٹ بحران کا سامنا کر رہی ہے۔ فلسطینی نائب صدر حسین الشیخ نے اپنے بیان میں کہا کہ سعودی گرانٹ مشکل معاشی حالات میں فلسطینی مالی استحکام کو بہتر بنانے میں اہم کردار ادا کرے گی، انہوں نے سعودی عرب کے فلسطینی عوام کے حقوق کے لیے مستقل، واضح اور مضبوط مؤقف کو بھی سراہا۔

اردن میں سعودی سفیر شہزادہ منصور بن خالد نے کہا کہ سعودی عرب فلسطینی عوام کے جائز حقوق اور آزاد ریاست کے قیام کی حمایت کے تاریخی مؤقف پر قائم ہے۔ ان کا کہنا تھا کہ یہ مالی امداد فلسطینی حکومت کو اپنی ذمہ داریاں نبھانے میں مدد دے گی اور صحت، تعلیم سمیت اہم شعبوں میں عوامی مشکلات کم کرنے میں اہم ثابت ہوگی۔

سعودی عرب کی یہ گرانٹ فلسطینی اداروں کے استحکام اور ان کی مضبوطی کے لیے جاری تعاون کا تسلسل ہے۔