امریکا کی روس پر نئی پابندیاں، تیل کی قیمتوں میں 4 فیصد سے زائد اضافہ

جمعرات کو عالمی منڈی میں تیل کی قیمتوں میں 4 فیصد سے زائد اضافہ ریکارڈ کیا گیا جب امریکا نے روس کی بڑی تیل کمپنیوں روسنیفٹ اور لوک آئل پر نئی پابندیاں عائد کر دیں۔

برینٹ خام تیل کی قیمت 65.30 ڈالر فی بیرل تک جا پہنچی جبکہ امریکی ڈبلیو ٹی آئی آئل 61 ڈالر سے تجاوز کر گیا۔
امریکی وزارت خزانہ کے مطابق یہ اقدام روس کے توانائی ذرائع سے حاصل ہونے والی آمدن کو کم کرنے اور یوکرین میں جنگ ختم کرنے کے لیے دباؤ بڑھانے کا حصہ ہے۔

ادھر بھارت سمیت ایشیائی ریفائنریز نے روسی خام تیل کی خریداری پر نظرثانی شروع کر دی ہے تاکہ امریکی پابندیوں سے بچا جا سکے۔
ماہرین کے مطابق اگر بھارت روسی تیل کی خریداری کم کرتا ہے تو عالمی مارکیٹ میں مزید دباؤ دیکھنے کو مل سکتا ہے۔

تاہم کچھ تجزیہ کاروں کا کہنا ہے کہ روس اپنی سپلائی کو چین اور مشرق وسطیٰ جیسے متبادل بازاروں کی طرف موڑ کر نقصان کو کم کر سکتا ہے، لہٰذا قیمتوں میں اضافہ عارضی ہو سکتا ہے۔