ابھیشیک بچن کا خواب پورا ہوگیا، 25 سال بعد پہلا بہترین اداکار ایوارڈ حاصل

بالی وُڈ کے معروف اداکار ابھیشیک بچن نے اپنے 25 سالہ فلمی سفر میں پہلی بار بہترین اداکار کا فلم فیئر ایوارڈ حاصل کرلیا۔
  فلم فیئر ایوارڈز 2025 کی تقریب میں انہیں یہ اعزاز فلم ’آئی وانٹ ٹو ٹاک‘ میں شاندار کارکردگی پر دیا گیا۔

ایوارڈ وصول کرتے ہوئے ابھیشیک بچن کی آنکھیں نم ہوگئیں۔ اپنے جذباتی خطاب میں انہوں نے کہا

“یہ میرا ہمیشہ سے خواب تھا کہ میں یہ ایوارڈ اپنے خاندان کے سامنے حاصل کروں۔”

انہوں نے اپنی کامیابی کا سہرا اہلیہ ایشوریا رائے بچن اور بیٹی آردھیا کے سر باندھا۔
ابھیشیک کا کہنا تھا کہ

“ایشوریا اور آردھیا، تم دونوں کا شکریہ کہ تم نے مجھے میرے خواب پورے کرنے کی اجازت دی۔ تمہاری قربانیاں ہی میری کامیابی کی بنیاد ہیں۔”

اداکار نے ایوارڈ کو اپنے والد امیتابھ بچن اور بیٹی آردھیا کے نام کرتے ہوئے کہا کہ

“یہ ایوارڈ میں دو خاص لوگوں کے نام کرتا ہوں — اپنے ہیرو، اپنے والد، اور اپنی دوسری ہیرو، اپنی بیٹی آردھیا کے نام۔”

ابھیشیک بچن نے تمام ہدایتکاروں اور پروڈیوسرز کا شکریہ ادا کیا جنہوں نے ان پر اعتماد کیا۔
انہوں نے کہا کہ یہ سفر آسان نہیں تھا مگر بے شک قابل فخر رہا۔

اداکار حال ہی میں ’ہاؤس فل 5‘ میں جلوہ گر ہوئے تھے اور اب وہ شاہ رخ خان اور سوہانا خان کے ساتھ اپنی نئی فلم ’کنگ‘ میں نظر آئیں گے۔
یہ ایوارڈ ان کے طویل فلمی سفر میں ایک نیا سنگ میل ثابت ہوا ہے۔